Á næstu dögum mun Jón Bjarnason sjávarútvegs- og landbúnaðarráðherra mæla fyrir tveimur frumvörpum á Alþingi. Með því fyrra verða lagðar til breytingar á lögum nr. 116/2006, um stjórn fiskveiða og taka þær til strandveiða. Frumvarpið gerir ráð fyrir að heimild til strandveiða verði lögfest og fyrirkomulag veiðanna verði í meginatriðum það sama og í fyrra. Þannig er gert ráð fyrir að strandveiðar muni einkum takmarkast af þeim aflaheimildum sem ráðstafað er sérstaklega til veiðanna, eða allt að 6.000 lestum af óslægðum botnfiski í stað 3.995 lesta af þorski auk annarra tegunda líkt og var á síðasta ári.